Ditët e fundit në media është folur shumë për një grindje mes Cristiano Ronaldos dhe trajnerit Zinedine Zidane pasi ky i fundit e zëvendësoi portugezin në minutën e 72 të sfidës së fundjavës mes Realit të Madridit dhe Las Palmas.
Është vetë francezi që vendos të qetësojë gjërat duke theksuar se ai incident tashmë është harruar plotësisht.
“Çdo gjë është në rregull”, tha Zidane. “Ronaldo nuk është i vetmi që mërzitet në momentin që zëvendësohet, kjo ndodh tek do futbollist. Tani po mendojmë për sfidën me Dortmundin”.
Problemi është se Reali do të përballet me Dortmundin duke mos qenë në formën më optimale, gjë që u duk edhe në 2 ndeshjet e fundit të kampionëve të Evropës, njofton Top-channel.
Në krahun tjetër, Dortmundi që pas humbjes me Lajpzigun, nuk është ndalur duke fituar 4 ndeshje radhazi në kampionat e Ligën e kampioneve në të cilat ka shënuar në total 20 gola.
Ndeshja mes Realit e Borussias do të luhet në “Signal iduna Park” në Dortmund dhe për skuadrën merenges, tioka gjermane nuk i sjell shumë fat. Madje në 3 vizitat e fundit në këtë stadium, Reali ka dalë i humbur.
