Kryetari i Kuvendit të Kosovës, Kadri Veseli kërcënoi sot shtetin e Serbisë me luftë, në qoftë se, siç tha ai, Serbia tenton që të hyjë sërish në Kosovë.
Gjatë akademisë përkujtimore për masakrën e Reçakut, Veseli deklaroi se “Serbisë plakë mos ta provon të kthehet, se më nuk do të ndalemi deri në Nish.”
Por, pikërisht sot Serbia ka shpalosur fuqinë ushtarake të saj.
Serbia e ka kremtuar me një paradë ushtarake dhe një shov ajror 73-vjetorin e çlirimit të kryeqytetit të saj gjatë Luftës së Dytë Botërore. Parada ku u përfshinë 2.500 trupa të këmbësorisë, parashutistë dhe njësi speciale të anti-terrorizmit u zhvillua në bazën ajrore të Batajnica-s, në periferi të Beogradit.
130 automjete ushtarake, tanke e raketa-hedhëse u ekspozuan në event, së bashku me 30 avionë dhe helikopterë, përfshirë këtu edhe MiG-un 29 të dhuruar presidentit serb Aleksandar Vuçiç nga ministri rus i Mbrojtjes Sergei Shoigu, përpara fillimit të stërvitjes ushtarake.
Fjalimin e mbajtur me këtë rast, Vuçiç e përdori për të treguar se Serbia po i forcon ndjeshëm forcat e saj mbrojtëse.
“Është e pamundur për çdo kriminel që të përpiqet të sulmojë e të dëmtojë Serbinë dhe t’ia hedhë paq. Ne e mbrojmë me vendosmërinë më të madhe sovranitetin kombëtar dhe sigurinë territoriale të këtij vendi e të gjithë qytetarëve të tij”, tha Vuçiç.
Kreu i shtetit serb theksoi edhe një herë se vendi është në procesin e anëtarësimit në Bashkimin Europian, por pavarësisht kësaj do të vazhdojë të ruajë një marrëdhënie të ngushtë e miqësore me Rusinë dhe Kinën. Pas paradës dhe spektaklit ajror, ushtarët kryen manovra të fokusuara tek anti-terrorizmi dhe situata pengmarrjeje.
