Urimet politike të Bajramit – si e lidhën liderët Kurbanin me krizën politike

Festa e Kurban Bajramit u urua nga të gjithë liderët e vendit dhe angazhoi gati të gjithë skenën politike në vend që të gjejnë fjalitë më të mira për të uruar besimtarët mysliman.

Por të gjithë ata u munduan që të gjejnë një lidhje mes sakrificës së Kurban Bajramit dhe aktualitetit të tanishëm politik e shoqëror në vend. Disa prej tyre zgjodhën edhe urimet e zakonshme për mirësi dhe më shuumë dashuri me njerëzve.

I tillë ishte edhe urimi i presidentit të vendit, Hashim Thaci. Ai vetëm uroi që familjet kosovare t’i gjejë të bashkuara kjo festë.

 

Por pasardhësi i Thaçit në krye të PDK-së, Kadri Veseli, e lidhi sakrificën e Kurban Bajramit me sakrificën e “burrave dhe grave që nuk janë në mesin tonë” duke iu referuar viktimave të luftës së fundit në Kosovë.

 

E kryeministri në detyrë Isa Mustafa u kujdes që urimin për Kurban Bajram ta lidhë me “përbashkimin në vlerat e solidaritetit” duke uruar që “të na prijë e mbara në rrugën e mëtejme të forcimit të shtetit”.

 

Kandidati për të zënë vendin e Mustafës, Ramush Haradinaj, urimin e tij e lidhi me fuqinë e Kurban Bajramit për ta forcuar “njerëzoren tek njerëzit dhe dashurinë për njëri tjetrën” por e përmendi sakrificën si çmim për ta arritur këtë.

Haradinaj nuk është se ka hasur në dashuri dhe mirëkuptim nga deputetët e Kuvendit të Kosovës për ta marrë besimin e drejtimit të Qeverisë. Ka më shumë se 2 muaj që po tenton të sigurojë numrat për Qeverinë e re.

Të njëjtin hall sikurse Haradinaj e ka edhe Albin Kurti. Por ai u mor me nevojën e një shteti të barabartë për të gjithë dhe nevojën e “solidaritetit për ata që janë në gjendje të vështirë ekonomike”.