Tre vëllezërit Bisaku zgjidhen për të shoqëruar futbollistët e Hamburgut

16.03.2017 13:38
Tre vëllezërit Bisaku zgjidhen për të shoqëruar futbollistët e Hamburgut

Davidi, nën emocionet që i shkaktonte prania e 60.000 shikuesve, përderisa fëmijët tjerë përshëndesin shikuesit me duar, ai thyen protokollin dhe nga gëzimi mban gjatë gjithë kohës duart në gjoks, duke bërë shqiponjën

“Në 130 vjet histori të klubit “Hamburg” të bundesligës nuk ka ndodhur që 3 fëmijë që janë vëllezër mes vete, të zgjidhen për të shoqëruar lojtarët në fushë në të njëjtën kohë. Domeniku është akoma i vogël dhe nëse ftohet edhe ai, atëherë është definitivisht një rekord dhe histori, të cilën po e bëjmë ne, një familje shqiptare”, thotë për albinfo.ch Gjon Bisaku, babai i katër djemve të vegjël të suksesshëm.

“Ndjehemi krenarë që klubi i madh i Bundesligës, Hamburgu ftoi 3 vëllezërit Bisaku për të shoqëruar profesionistët në fushë. Djali i madh Samueli kishte shoqëruar FC Bayern München në kohën e Guardiolës dhe Shaqirit, djali i dytë ishte me Frankfurtin, kurse djali i tretë ishte i ftuar dje me Gladbach, me ish klubin e Granit Xhakës”, vazhdon Gjoni.

“Për çdo fëmijë është një ëndërr që të marrë një ftesë të tillë, por ajo që nuk shihet prapa këtyre akteve sportive është sakrifica dhe mundi i prindërve. Ne jemi mirënjohës dhe falënderojmë Klubin e Hamburgut, për një akt të tillë. Ishte një moment emocionues. Mandej Davidi nën emocionet që i shkaktonte prania e 60.000 shikuesve, përderisa fëmijët tjerë përshëndesin shikuesit me duar, ai thyen protokollin dhe nga gëzimi mban gjatë gjithë kohës duart në gjoks, duke bërë shqiponjën.

Ne do të vazhdojmë edhe më tutje rrugën sportive dhe pritet që edhe Domeniku të ftohet kur ta plotësojë moshën. Kështu ne jemi krenarë si shqiptarë të punojmë në rrugën futbollistike dhe të përfaqësojmë si është më së miri kombin tonë në fushën sportive”, thotë Gjon Bisaku./Insajderi.com