Ish-kryeministri i Britanisë së Madhe, Tony Blair ka deklaruar se do të mbyllë perandorinë e tij biznesore dhe po ashtu firmën e tij të konsulencës së qeverive, punë në të cilën u fokusua pas largimit nga detyra.
Në një deklaratë të publikuar në faqen e tij, Blair thotë se një shumë substanciale të parave do t’i dhurojë për organizata jo fitimprurëse, raporton The Independent.
Ish-lideri i Britanisë ka marrë shumë kritika mbi fitimet që ka siguruar kryesisht nga ofrimi i konsulencës për qeveri të huaja dhe firma shumëkombëshe. Ai ka sqaruar se puna e tij tashmë do të fokusohet tek ato jofitimprurëse.
Ish-kryeministri britanik që ka punuar dhe si konsulent për qeverinë shqiptare, është kritikuar për ofrimin e këshillave për regjimin në Kazakistan sesi të përballonin masakrën mbi civilët nga punonjësit e sigurisë. Gjithashtu, Blair ka ndihmuar dhe kryeministrin e Serbisë, Aleksandër Vuçiç.
Pasuria e Blair përllogaritet që arrin në 80 milionë paund. /Insajderi.com