Kryeministri po tenton të arrijë 6 mijë pëlqime në Facebook, pas rikthimit para një muaji, duke qëndruar kështu shumë larg liderëve të tjerë partiak sikurse Hashim Thaçi që i ka mbi 300 mijë ndjekës.
Por kryeministri mund të cilësohet “me fat” për këtë mungesë komunikimi në rrjetin social në të cilin më shumë ka bërë skandale në të shkruarit e statuseve.
Prej që Facebook ka vënë në shërbim edhe disa buton të tjerë si formë e reagimit përpos “Like”, liderët partiak, sidomos ata që janë të famshëm në rrjete sociale, janë përballur edhe me reagime të ndryshme të ndjekësve.
Për shembull, i votuari për president Hashim Thaçi, që ka më së shumti ndjekës ka nxitur më së shumti reagime. Në postimin e një fotografie të dizajnuar në të cilën shkruan “Në krye të detyrës” me fotografinë e tij, Thaçi ka marrë mbi 50 mijë reagime të ndryshme. Shumica e tyre janë likes por një pjesë e mirë e ndjekësve të tij kanë reaguar duke e shprehur zemërim dhe përqeshje.
Prej që rrjeti social Facebook ka mundësuar butonat e rinj përpos like, liderët në përgjithësi po përballen me reagimin qytetar në Facebook.
Megjithatë i sapo zgjedhur president, është duke u përballur me më së shumti reagime nga ndjekësit e tij.
Por kësaj nuk i kanë shpëtuar as liderët e tjerë opozitar si Ramush Haradinaj e Fatmir Limaj të cilët nuk është se arrijnë as 100 mijë ndjekës.
Lëvizja Vetëvendosje që është partia më e pranishme në Facebook me afro 250 mijë ndjekës, megjithatë merr reagime më të mira sesa që merr Thaçi i cili ka rreth 50 mijë ndjekës më shumë sesa VV-ja.
