Testi që mund të parandalojë lindjen e parakohshme

09.06.2018 22:53
Testi që mund të parandalojë lindjen e parakohshme

Studiuesit amerikanë dhe danezë njoftuan se kishin realizuar një test gjaku, jo shumë i kushtueshëm, që mundëson parandalimin në 80 % të rasteve nëse një grua shtatzënë do të lindte një bebe të parakohshme, sipas një studimi.

Edhe pse studime të tjera janë të nevojshme para se testi të jetë gati për t’u përdorur në shkallë të gjerë, ekspertët konfirmojnë se ai ka potencialin për të reduktuar numrin e vdekjeve dhe komplikacioneve të shkaktuara nga 15 milionë lindje të parakohshme në vit në mbarë botën.

“Testi mund të përdoret gjithashtu për të përcaktuar datën e lindjes së nënës në mënyrë më të besueshme dhe më pak të kushtueshme se ekografia”, thekson raporti i publikuar në revistën “Science”, transmeton atsh.

Testi mat aktivitetin e gjeneve të nënës, të placentës dhe të fetusit duke vlerësuar nivelet e ARN-së pa qeliza, që janë molekula që transportojnë instruksionet gjenetike të trupit.

“Ne kemi konstatuar se një grup gjenesh janë shumë parashikuese sa i përket grave me rrezik për një lindje të parakohshme”, deklaroi Mads Melbye, bashkautor kryesor, profesor i ftuar në Universitetin e Stanfordit dhe drejtues i Statens Serum Institut à Copenhague.

“Kam kaluar shumë kohë për shumë vite duke punuar për të kuptuar lindjen e parakohshme. Ky është progresi i parë shkencor real dhe domethënës për këtë problem që prej shumë kohësh”, theksoi ai.

Një tjetër hulumtues në këtë studim është Stephen Quake, profesor i bio-inxinierisë dhe fizikës aplikuar në Universitetin e Stanford, ish-drejtues i një ekipi që ka krijuar një test gjaku për sindromin Doën në 2008-ën, sot i përdorur nga më shumë se tre milionë gra shtatzëna në vit.

Përcaktuar si një bebe që vjen në jetë të paktën tre javë para, lindja e parakohshme prek 9% të lindjeve në SHBA dhe është shkaku i parë i vdekjes para moshës pesë vjeçare tek fëmijët në mbarë botën.

“Deri tani, disa teste për parandalimin e lindjeve të parakohshme ishin në dispozicion, por ato kishin tendencë të funksiononin vetëm tek gratë me rrezik të lartë dhe ishin të sakta vetëm në rreth 20% të rasteve”, sipas raportit.