Ministri i Drejtësisë, Abelard Tahiri ka folur edhe një herë lidhur me iniciativën e deputetëve të Kuvendit të Kosovës, lidhur me propozimin dhe hartimin e Projektligjit për Amnisti. Ka thënë se ky Projektligj është vetëm përpjekje për të legjitimuar hedhjen e gazit në Kuvendin e Kosovës, nga legjislatura e kaluar, shkruan Insajderi.
“Nisma legjislative për propozimin dhe hartimin e Projektligjit për Amnisti, e ndërmarrë së fundmi nga disa deputetë të Kuvendit të Republikës së Kosovës, është përpjekje direkte për të legjitimuar dhunën e manifestuar nga deputetë të mandatit të kaluar brenda hapësirave të institucionit të Kuvendit”.
“Kjo nismë legjislative ka për qëllim të përjashtojë nga ndjekja penale, individë të caktuar, të cilët kanë përgjegjësi penale individuale për veprat për të cilat janë duke u hetuar dhe për një pjesë edhe janë dënuar” ka shkruar Tahiri.
Ministri Tahiri më tej ka shkruar se vet ai personalisht do të angazhohet që kjo nismë të mos mbështetet.
“Projektligji mëton të vendosë një praktikë të pa precedentë deri më tani dhe si e tillë, edhe cenon parimin e barazisë para ligjit për të gjithë qytetarët, dhe për më tepër i lëndon përpjekjet dhe angazhimet e përbashkëta institucionale për fuqizimin dhe konsolidimin e sundimit të ligjit dhe Shtetit të së Drejtës”.
“Ministria që unë udhëheqë, në bazë të përgjegjësive ligjore, sipas kërkesës së Zyrës së Kryeministrit, ka përgatitur Opinionin e saj, i cili evidenton se kjo nismë paraqet regres për rendin juridik dhe mbi këtë bazë do të angazhohem edhe personalisht që kjo nismë të mos mbështetet si e tillë” ka përfunduar Tahiri
