Asnjëherë nuk është vonë të diplomosh, as edhe në moshën 72-vjeçare. Kjo shprehje i shkon për shtati, Destan Danglliës, i cili kishte nisur një ‘aventurë’ mjaft interesante derisa tani është afër përfundimit.
Atij nuk iu dha e drejta e studimit, pasi babai i tij ishte një ish i dënuar politik. Por, gjysmë shekulli më vonë, ai është regjistruar në fakultet.
Destani ka 5 vite që ka përfunduar degën e Agro-Mjedisit. Aktualisht ai po punon për diplomën. 9 vjet më parë, përballja e parë në këtë fakultet ishte me profesor Lekajn, bashkëmoshatar i tij, raporton “TCH”.
“Unë isha në një moshë, tani që nuk kisha pretendime për punë, por desha të marr një diplomë ashtu siç e kam menduar unë, duke bërë edhe një projekt dhe për këtë fillova që në atë vit, bëra një fidanishte. Kam bërë një punë parapërgatitore, kam bërë formate të ndryshme, ku kam nxjerrë bazën materiale, financat, të gjitha këto mendoj që tani përpara provimeve të dhjetorit ta kem finalizuar si projekt ide”, shprehet Destan Dangllia.
Sot, ai është 72-vjeçar dhe në dhjetor pret të diplomohet. Por, nuk ka ndërmend të ndalet, duke shpresuar më vonë edhe për një “master”. Dhe pse jo, edhe doktoraturë.
