Spanja po merr në konsideratë ndryshime kushtetuese, të cilat do t’u lejojnë rajoneve të saj mbajtjen e referendumeve të pavarësisë në të ardhmen.
Ministri i Jashtëm spanjoll, Alfonso Dastis i tha BBC-së se, mund të zhvillohet një votim mbarëkombëtar mbi këtë çështje. Lëvizja e Madridit vjen në vazhdën e zhvillimeve të Katalonjës, që e zhytën vendin në krizën e tij më të thellë politike prej dekadash të tëra.
Situata atje nuk është qetësuar ende. Aktivistët pro pavarësisë bllokuan më herët rrugët kryesore dhe disa linja hekurudhore në Katalonjë, në shenjë proteste ndaj arrestimit të udhëheqësve të shkarkuar. Transporti publik në Barcelonë u kufizua në shërbimet më minimale e nuk munguan ngërçet e trafikut, por pavarësisht vonesave të lëvizjes, dyqanet dhe bizneset e vazhduan punën si normalisht.
