Skandali i trukimeve nuk e ndalë Skënderbeun të bëhet kampion

22.09.2016 21:10
Skandali i trukimeve nuk e ndalë Skënderbeun të bëhet kampion

Një nga ngjarjet më të rënda të historisë së trukimeve të futbollit shqiptar, të cilën skuadra kampione e Shqipërisë e vuajti me pezullimin për një vit nga aktivitetet ndërkombëtare, vazhdon të dominojë opinionin publik.

Nënkampionët e Partizanit, veç përfitimit të parave të UEFA-s me statusin e kampiones, për shkak të këtij penalizimi, kanë kërkuar edhe titullin kampion të sezonit të shkuar. Por presidenti Duka e mbyll debatin: Skënderbeu mbetet kampion i vendit.

“Nga pikëpamja juridike ne nuk kemi se çfarë të bëjmë më tepër, sepse po të lexosh statutin e FSHF-së, shkalla më e lartë e gjykimit është CAS-i. Ai komision ka të drejtë ta përjashtojë edhe nga kampionati shqiptar, por edhe fare nga futbolli, megjithatë ka marrë atë vendim që ka marrë. Pavarësisht se ndonjëri ka pasur dëshirë ta dënojnë me vdekje, ata e kanë dënuar me një vit mospjesëmarrje në kupat e Evropës”, shprehet Armand Duka, president i Federatës Shqiptare të Futbollit.

UEFA njoftoi javë më parë se Skënderbeu ka trukuar mbi 50 ndeshje futbolli, prej të cilave shumica në kampionaint shqiptar, por ka pasur ndeshje edhe në garat evropiane.

Presidenti Duka sqaron edhe njëherë se, kërkesa e Partizanit për të marrë titullin kampion të sezonit të kaluar është ligjërisht e pamundur.

“Organet juridike të FSHF-së janë nën nivelin e CAS-it. Çdo lloj vendimi, edhe nëse do ta marrin organet e Federatës Shqiptare të Futbollit, palët në fjalë, qoftë Skënderbeu apo Partizani do ta ankimojnë në CAS dhe më pas CAS-i do të shprehet duke thënë se e ka marrë një herë vendimin për këtë çështje, e për këtë arsye nuk mund ta ndryshojë më atë. Nuk besoj se kjo çështje duhet diskutuar më”, tha Armand Duka.

Për presidentin e FSHF-së, futbolli është gjëja më e mirë që ka vendi ynë, duke iu drejtuar më pas politikës, e në veçanti atyre që sipas tij kërkojnë shpeshherë ta përbaltin këtë sport. Kësaj radhe, kritikat, insinuatat dhe goditjet që ka marrë sistematikisht nga deputeti socialist dhe tifozi i Partizanit, Erion Braçe, marrin një përgjigje: