Gjatë 24 orëve të fundit raportohet për dy raste të dhunës ndaj zyrtarëve policorë. Në rr. “Fehmi Agani” në Gjakovë dje rreth orës 13:40 është arrestuar i dyshuari mashkull shqiptar, pasi që i njëjti gjatë tentimit të arrestimit ka shtënë me armë zjarri në drejtim të zyrtarëve policorë.
“Zyrtarët policorë i janë kundërpërgjigjur me zjarr, gjatë te shtënave nuk është lënduar askush”, thuhet në raportin e policisë.
Tek i dyshuari është gjetur dhe konfiskuar një pistoletë dhe një sasi e vogël e substancës së dyshuar narkotike, kurse me urdhër të prokurorit i dyshuari është dërguar në mbajtje.
Ndërsa në një rast tjetër në Graçanicë, dje në ora 14:50 është arrestuar i dyshuari mashkull serb, pasi që i njëjti e ka shqetësuar viktimën femër serbe në vendin e punës, njëherit ka kanosur verbalisht zyrtarët policorë gjatë kryerjes së detyrës zyrtare.
“I dyshuari me vendim të prokurorit është dërguar në mbajtje”, thuhet në raportin e policisë.
