Parlamenti i Kanadasë i hapi përfundimisht rrugën përdorimit të marihuanës, duke miratuar edhe një ligj për legalizimin e lëndës narkotike.
Ligji për kanabisin kaloi pengesën përfundimtare të martën me një votim në senat me 52 vota pro dhe 29 kundër.
Projektligji kontrollon dhe rregullon mënyrën se si mund të kultivohet, shpërndahet dhe shitet droga. Kanadezët do të jenë në gjendje të blejnë dhe të konsumojnë legalisht kanabis duke nisur nga fillimi i këtij shtatori.
Kanadaja është vendi i dytë në mbarë botë që ka legalizuar përdorimin rekreativ të drogës.
“Deri tani, ka qenë shumë e lehtë për fëmijët tanë të marrin marihuanë – dhe për kriminelët që të korrin fitimet. Sot, ne e ndryshojmë këtë. Plani ynë për legalizimin dhe rregullimin e marihuanës sapo ka kaluar në Senat”, ka shkruar në Twitter kryeministri Justin Trudeau.
Por disa grupe politike konservatore kundërshtuan ligjin e ri.
Qeveria pritet t’u japë provincave dhe territoreve, si dhe komunave, tetë deri në 12 javë për të ngritur tregun e ri të marihuanës. Ky afat kohor do të lejojë gjithashtu industrinë dhe forcat e policisë që të përgatiten për kuadrin e ri ligjor./Ora News/
