Shpenzimet enorme të Komunës së Prishtinës me veturat, sipas asamblistit të LDK-së

03.03.2017 18:27
Shpenzimet enorme të Komunës së Prishtinës me veturat, sipas asamblistit të LDK-së

Rreth 154 mijë euro ka shpenzuar Komuna e Prishtinës për karburante të veturave gjatë vitit 2016, ka thënë sot asamblisti i LDK-së në këtë komunë, Flamur Shala.

Sipas llogarive të Shalës, Komuna e cila udhëhiqet nga Shpend Ahmeti, ka shpenzuar shuma të mëdha për karbuantet e veturave.

“Nëse merret çmimi mesatar prej 1€ për litër të karburantit, del se janë shpenzuar 154,942.64 litra. Nëse shpenzimi mesatar i një veture është 10 l në 100 km, del se me këtë sasi karburanti mund të kalohen 1,549,420 kilometra. Për 250 ditë pune gjatë vitit, del se çdo ditë janë kaluar nga 6,197.68 km me veturat e komunës”, ka përllogaritur kështu Shala.

Shala ka deklaruar se duke pasur parasysh që nga 58 veturat e komunës, 50 janë operacionale del se çdo veturë ka kaluar nga 123.95 km në ditë.

“Edhe po të supozohet se çdo veturë në ditë pune kalon nga 50km, del se shpenzimi mesatar i karburantit do të ishte 24.8 l në 100 km. Së bashku me shpenzimet e mirëmbajtjes, regjistrimit e qiramarrjes, komuna ka shpenzuar 263,948.06 euro për 50 veturat e saja në vitin 2016, prej nga del që çdo veturë i ka kushtuar nga 5278.96 euro buxhetit komunal për vitin 2016”, ka thënë Shala.

Ka folur edhe për veturat me qira.

“11 veturat me qira për vitin 2016 i kushtuan Komunës 51.154.50 €, rrumbullak 7 vetura të reja (DACIA, të njëjta si të qirasë). Veturat me qira (11 sish), kryetari të mos i nxjerr në shesh, se kanë shpenzime, e mund të dalë edhe vetura e 8-të”. /Insajderi.com