Prokuroria e Krimeve të Rënda ka shpallur në kërkim shefin e rendit të Komisariatit të Policisë së Kurbinit, Ylli Vata. Ai akuzohet për veprat penale “Kultivimi i lëndëve narkotike”, “Grupit të strukturuar kriminal” dhe “Kryerja e veprimeve në kuadër të grupit të strukturuar kriminal”.
Për këto akuza, Gjykata e Krimeve të Rënda ka caktuar në mungesë edhe masën e sigurisë arrest me burg, masë e cila nuk është ekzekutuar, pasi oficeri Vata nuk është paraqitur më në detyrë që nga momenti kur është marrë vendimi i gjykatës, duke iu shmangur drejtësisë.
Sipas hetimeve të kryera, shefi i rendit në Komisariatin e Kurbinit, ka bashkëpunuar me një grup kriminal në kultivimin dhe më pas shitjen e kanabisit.
Grupi në fjalë është goditur në muajin nëntor të vitit të kaluar, kur u arrestuan 7 persona, një prej të cilëve efektiv policie.
Nga hetimet ka rezultuar se organizatori i grupit, Lefter Neli kishte marrëveshje me shefin e rendit, Ylli Vata, se nuk do të pengohej në aktivitetin e tij kriminal.
Këtë fakt, përveç hetimeve dhe dëshmive të personave të arrestuar, prokuroria e argumenton edhe me faktin që aksionet e policisë kundër parcelave me kanabis në zonën e Kurbinit dhe që drejtoheshin nga Vata, në asnjë rast nuk kanë ndërhyrë në parcelat e Lefter Nelit./Top Channel/
