Portieri shqiptar, Etrit Berisha, është rikthyer të luajë 90’ minuta në humbjen që skuadra e tij Lazio e pësoi nga Sassuolo, 0-2.
Ndeshja u zhvillua në “Olimpico” të Romës, në një mot me shi teksa Lazio e nisi më mirë ndeshjen duke rrezikuar disa herë në pjesën e parë derisa erdhi momenti kur skuadra mysafire shënoi përmes një penalltie të fituar nga Berardi i cili edhe e konkretizoi atë, në minutën e 41’.
Vetëm një minutë pas golit të Sassuolos, skuadra bardheblu pati rast për të barazuar rezultatin me anë të italianit, Parolo, i cili goditi mbi portë duke lënë skuadrat të shkojnë në pushim me epërsinë e Sassuolos.
Në pjesën e dyte Sassuolo tregoi se goli shënuar në pjesë të parë nuk ishte befasi, pasi shënoi në minutën e 67’ përmes ish-sulmuesit të Ceseans, Gregoire Defrel.
Lazio deri në fund nuk arriti as ngushtimin e rezultatit çka bëri që ndeshja të përfundoi 0-2. Lazio me këtë humbje mbetet në vendin e tetë me 37 pikë, kurse Sassuolo është një pozitë më lartë me katër pikë më shumë.
