Real Madridi është duke përgatitur transferimin e madh të radhës në afatin kalimtar.
Gjiganti madrilen duket se ka gjetur përforcimin e radhës për merkaton e verës së 2018-tës, raporton ‘Marca’, përcjell Insajderi.
Kampioni spanjoll dhe evropian, është i gatshëm të paguajë shumën e 200 milionë eurove për ish-yllin e Barcelonës, Neymar.
‘Los Blancos’ nuk kanë në plan të bëjnë ndonjë transferim të madh gjatë afatit të janarit, duke konsideruar se do të kenë shërbimet e talentit të ri brazilian, Vinicius Junior.
Reali verën e kaluar tentoi të sigurojë transferimin e Kylian Mbappe, dhe përkundër faktit se futbollisti u pajtua për të nënshkruar kontratën, familja e francezit vendosi që të mos kompletohej marrëveshja, për shkak të arsyeve ekonomike.
Pasi nuk arriti të nënshkruajë me francezin, skuadra e Zidane e ka shndërruar në prioritet transferimin e Neymarit, i cili këtë verë u bë transferimi më i shtrenjtë në histori të futbollit, pasi kompletoi kalimin te Paris Saint-Germain.
Sipas ‘Marca’, për Neymarin, Real Madrid është i gatshëm të paguajë shumën e 200 milionë eurove, derisa te PSG, ai u transferua për 222 milionë euro. /Insajderi