Kandidati për kryeministër nga koalicioni PAN, Ramush Haradinaj, një ditë para mbajtjes së seancës konstitutive ku pritet të votohet kryeparlamentari, thotë se vonesat e deritashme kanë të bëjnë me gjetjen e një formule për institucione stabile qeverisëse dhe prandaj opinioni publik duhet të ketë mirëkuptim.
Haradinaj thotë se vendi nuk mund të jetë peng i inateve dhe kalkulimeve si dhe është koha që partitë politike të reflektojnë për zhbllokimin e vendit.
“Është koha që partitë politike dhe udhëheqësit e tyre të reflektojnë dhe t’i pranojnë rregullat e lojës që na i ka percaktu Kushtetuta dhe Gjykata Kushtetuese dhe ta zhbllokojmë vendin”, thotë Haradinaj, transmeton Express.
Haradinaj e ka potencuar që nuk janë të interesuar që të krijojnë qeveri vetëm sa për ta bërë.
“E para zgjedhjet e kanë prodhu rezultatin që e dini të gjithë.
E dyta jemi përballë një kornize ligjore që nuk po krijon lehtësira.
E treta nuk jemi aspak të interesuar që ta bëjmë një qeveri sa për ta bërë”- ka thënë ai.
