Qeveria shkurton buxhetin e RTK-së

23.08.2017 21:50
Qeveria shkurton buxhetin e RTK-së

Ministria e Financave për muajt korrik dhe gusht ka ndarë mbi 300 mijë euro më pak për transmetuesin publik të Kosovës.

Një situatë e tillë, ka nxitur reagimin e drejtorit të përgjithshëm të Televizionit  Publik, Mentor Shala, sipas të cilit, mungesa e buxhetit mund të sjellë telashe brenda mediumit që ai e udhëheq.

“Muajt e fundit, për muajin korrik dhe gusht jemi ballafaquar me një situatë jashtëzakonisht serioze si RTK për shkak të alokimit, siç është planifikuar të mjeteve nga Ministra e Financave në RTK. Dmth, janë diku afër 300 mijë vetëm këta dy muaj me pak që janë alokuar nga Ministria, dhe kjo na shkakton jashtëzakonisht telashe të mëdh”, deklaroi Shala.

Për më tepër, sipas tij, mënyra se si kjo ministri ndan paratë për RTK-në, është e kundërligjshme.

“Mjetet alokohen tash çdo muaj e me ligj është e paraparë që çdo tre muaj ashtu siç është e paraparë edhe me ligj ashtu e kemi planifikuar. RTK është futë në obligime në bazë të planifikimit të cilin e ka pas dhe tash jemi ne një situatë që mund të prodhojë një krizë të mundshme në mungesë të mjeteve financiare…”, deklaroi më tej drejtori i RTK-së.

Por, në Ministrinë e Financave deklarojnë se për këtë çështje RTK duhet të kërkojë përgjigje në Kuvendin e Kosovës.

Në një përgjigje të shkurtër përmes postës elektronike ata thonë se Kuvendi është sqaruar nga Thesari me anë të një shkrese sa i përket ndarjes së mjeteve buxhetore për RTK-në.(RTK)