Ditëve të fundit partitë politike, qoftë ato në pozitë apo në opozitë, kanë nisur t’i prezantojnë platformat për unitet politik.
Kreu i PDK-së, Kadri Veseli e ka prezantuar një të tillë, duke përcaktuar pesë temat e mëdha me të cilat do të duhej i tërë spektri politik të ketë unitet.
Diçka të ngjashme e ka prezantuar edhe LDK-ja, e cila kërkon me ngulmë që të shkohet në zgjedhje të parakohshme.
Por politologu Ramush Tahiri nuk beson në suksesin e iniciativave të subjekteve politike për arritjen e konsensusit shtetëror rreth çështjeve të mëdha.
Në një intervistë për “Epokën e Re”, ai ka thënë se iniciativa e Partisë Demokratike të Kosovës dhe ajo e Lidhjes Demokratike të Kosovës janë të pasinqerta dhe do të dështojnë.
Sipas tij, subjektet politike nuk do t’u përgjigjen pozitivisht këtyre iniciativave, duke i vënë kushte njëra-tjetrës.
Tahiri ka bërë me dije se iniciativat e tilla janë të shtyra nga pat pozicioni që gjenden në pozita dhe opozita.
Ai ka deklaruar se opozita nuk i ka 61 vota për ta rrëzuar Qeverinë, kurse kjo e fundit nuk ka shumicën e nevojshme për t’i shtyrë përpara proceset.