Presidenti Hashim Thaçi ka vizituar Librarinë e Parlamentit të Kanadasë gjatë vizitës së tij në këtë shtet, dhe nga ajo që ka shkruar në Facebook, ku ka publikuar disa fotografi ai është impresionuar me këtë librari.
“Gjatë vizitës në Parlamentin e Kanadasë vizitova disa prej pjesëve më të veçanta të ndërtesës. Libraria e Parlamentit, me mbi 1 milion ekzemplarë të librave e dokumenteve historike, që nga themelimi i Konfederatës së Kanadasë para 150 viteve, te marrja e sovranitetit të plotë e deri te zhvillimet e sotme, por edhe me arkitekturën dhe orenditë e saj, është një elaborim madhështor i historisë së Kanadasë”, ka shkruar Thaçi në Facebook.
