Kryediplomati kosovar Enver Hoxhaj e ka cilësuar “turistike” vizitën që i ka bërë sot Kosovës, ish-ministri i Punëve të Jashtme të Serbisë, Vuk Jeremiq.
Siç shkruante sot B92, Jeremiq qëndroi në Pejë gjatë ditës së premte, me ç’rast u takua me krerët e Patriakanës së Pejës, nga ku është duke bërë fushatë për zgjedhjet në Serbi.
Por, sipas ministrit të Punëve të Jashtme të Kosovës, vizita e Jeremiqit në Pejë ka qenë vetëm turistike.
“Shpresoj që Vuk Jeremiç e shijoi vizitën e tij turistike, motin dhe pamjet e trashëgimive kulturore të Kosovës. Numri i turistëve nga Serbia është duke u rritur”, ka shkruar ministri Hoxhaj në Twitter.
Siç ka raportuar sot Insajderi, Jeremiq është futur pa leje sot në Kosovë.
Ministria e Punëve të Jashtme të Kosovës ka sqaruar se ish-ministri serb i Punëve të Jashtme, Vuk Jeremiq, i cili gjatë ditës ka qëndruar në Pejë, nuk bën pjesë në listën e zyrtarëve të cilët duhet të kërkojnë leje për të hyrë në Kosovë. /Insajderi.com
