Në pikën kufitare në Merdar sot u rikthyen kolonat e gjata. Pritjet e bashkatdhetarëve të cilët i përfunduan pushimet ishin deri në 5 orë. Pavarësisht këtij fluksi në pikën kufitare të kontrollit të autoriteteve serbe punon vetëm një zyrtar kufitar.
Udhëtarët ankohen për këto pritje. Me gjithë përpjekjet e RTK-së për të marrë një prononcim nga Policia kufitare e Kosovës, kjo nuk ishte mundur.
Në Qendrën Kombëtare për Menaxhim Kufitar njoftojnë se pritjet në disa pikëkalime kufitare po zgjasin deri në tri orë, përgjigje e cila nuk përkon me realitetin sepse në këtë vendkalim pritjet janë nga 4 deri ne 5 orë në dalje ndërsa në hyrje të Kosovës vetëm 15 minuta
Nga autoritetet e Kosovës këto pritje konsiderohet të jenë gati të pashmangshme për shkak të fluksit të madh të qytetarëve të Kosovës që jetojnë jashtë vendit, e të cilët gjatë sezonit të verës vijnë për pushime në vendlindje.
Në Ministrinë e Diasporës thonë se gjatë këtij sezoni të verës ka arritur një numër i madh i ankesave të emigrantëve nga Kosova, të cilët janë ankuar për pritjet e gjata për të kaluar procedurat kufitare. Numri i qytetarëve të Kosovës që jetojnë në vende të ndryshme të Evropës dhe botës, të cilët i janë përgjigjur regjistrimit, është rreth 350 mijë, por thuhet se ky numër është shumë më i madh./RTK
