Për shkak të bombës në makinë, arrestohet një gazetar

25.11.2017 12:05
Për shkak të bombës në makinë, arrestohet një gazetar

Forcat e sigurisë së Pakistanit sot e kanë arrestuar gazetarin, Khalid Afridi, dhe një rojtar të sigurisë të klubit të gazetarëve në rajonin fisnor, Khyber, pasi dje është zbuluar një bombë nën automobilin, i cili ishte përdorë nga katër gazetarë në pjesën veriperëndimore të Pakistanit.

Gazetari i arrestuar, Khalid Afridi, nga rrjeti News TV Channel në Khyber, ishte njëri prej katër reporterëve që dje udhëtonin me makinë, kur ishte gjetur bomba magnetike e vendosur nën të.

Ky grup i gazetarëve, përfshirë edhe korrespondentin e Radios Evripa e Lirë, Farhad Shinwari, po raportonte për një garë vjetore të automobilave në rajonin Khyber.

Afridi e kishte huazuar makinën në qytetin Jamroud, ku kishte filluar gara e automobilave, dhe po udhëtonin para garuesve, kur dy persona të tjerë me makinën e tyre e vërejtën eksplozivin në veturën që udhëtonte para tyre.

Pastaj, një ekip i specializuar e çmontoi bombën, e cila i kishte afro dy kilogramë eksploziv.

Autoritetet, po ashtu, e kanë arrestuar edhe një rojtar të sigurisë në një vend ku kjo veturë ishte e parkuar, në kuadër të një klubi të gazetarëve në Jamroud.