Më në fund shpresë për pak reshje dhe freski

09.08.2017 13:58
Më në fund shpresë për pak reshje dhe freski

Një pjesë e Evropës Jugore, sipas meteorologëve po fillon të freskohet, pas ditëve të tëra me temperatura përvëluese që karakterizuan valën e të nxehtit me emrin “Lucifer”.

Në disa pjesë të Spanjës jugore dhe në Mesdhe, temperaturat po bien disi, por situata mbetet e njëjtë në zonat juglindore të kontinentit.

Pjesë të Greqisë dhe Maqedonisë kanë shpallur gjendjen e emergjencave, për shkak të frikës se qindra zjarre të dala jashtë kontrollit gjatë fundjavës mund të vazhdojnë të përhapen.

Në Itali janë 3 viktimat në aksidente, gjatë stuhive të dhunshme që pasuan valën e jashtëzakonshme të të nxehtit në pjesët veriore të vendit.

Raportet më të fundit parashikojnë se pjesa më e madhe e Evropës Jugore dhe Lindore do të kenë diell ditët e ardhshme. Sidoqoftë do të ketë edhe reshje të izoluara shiu në terrenet më të larta, në Itali dhe Evropën Juglindore. Temperaturat maksimale do të jenë 30 gradë në Spanjën jugore dhe Itali.

Ndërkohë që meteorologët konfirmojnë se, ndërsa retë dhe shiu do të bëjnë që temperaturat në Evropën Perëndimore të bien disi, Evropa Lindore do të vazhdojë të regjistrojë temperatura mbi normalen.

Nuk parashikohet sipas tyre të jetë aq nxehtë sa këto ditë të shkuara, por temperaturat maksimale do të vazhdojnë të qëndrojnë në rreth 30 gradë Celsius, ndërsa në Evropën Juglindore, përfshirë Shqipërinë, temperaturat pritet të qëndrojnë mbi mesataren e sezonit.