Federika Mogerini nesër mbërrin në Shkup. Sipas agjendës, ajo do të takohet me Ivanovin në villën Vodno, ndërsa më vonë edhe me liderët e partive politike parlamentare. Përfaqësuesja e lartë për punë të jashtme dhe siguri vjen në Maqedoni si pjesë e mini-turnit në Ballkan, në një atmosferë të tensionuar.
Sipas njoftimeve, takimet me kryetarin e shtetit dhe me partitë do të jenë relativisht të shkurtra. Sipas ish ambasadorit të Maqedonisë në NATO, Nano Ruzhin, vizita edhe pse e shkurtër do të rezultojë me theksim të mesazheve të rëndësishme që duhet t’i përshpejtojnë proceset politike.
“Takimi më i rëndësishëm do të jetë ai me mandatarin e ardhshëm Zoran Zaev rreth mundësisë për përafrim të përshpejtuar të Maqedonisë drejt Bashkimit Evropian përmes implementimit të marrëveshjes së Përzhinës”, tha Nano Ruzhin, ish-Ambasador i RM në NATO.
Mbrëmë, Stejt Departamenti amerikan përsëri apeloi që sa më shpejt të formohet qeveria e re.
“SHBA u bëjnë thirrje liderëve të Maqedonisë të formojnë qeveri të re, pa vonim të mëtutjeshëm. E gjithë kjo duhet të jetë në përputhje me Kushtetutën dhe aspiratat e vendit për anëtarësim në Bashkimin Evropian dhe në NATO”, thanë nga Stejt Departamenti.
Sipas Stejt Departamentit, formimi i qeverisë së re, e përcaktuar ndaj sundimit të së drejtës dhe implementimin e reformave të nevojshme, do të ndihmojë t’i jepet fund krizës politike e cila seriozisht e ngadalësoi zhvillimin demokratik dhe ekonomik të Maqedonisë si dhe integrimin e saj në strukturat eruo-atlantike. Me porosi të ngjashme, para disa ditëve doli edhe eurokomesari dhe sekretari i përgjithshëm i NATO-s Jens Shtolltenberg./AlsatM