Ministrja e Drejtësisë heton disa zyrtarë të saj

08.03.2017 19:50
Ministrja e Drejtësisë heton disa zyrtarë të saj

Ministria e Drejtësisë njofton opinionin publik se pas publikimit të fotografive dhe shkrimeve në disa portale në të cilat shihen zyrtarë të Ministrisë së Drejtësisë, përkatësisht Shërbimit Korrektues të Kosovës, në shoqëri me persona të dënuar më parë për vepra penale, Ministrja e Drejtësisë, Dhurata Hoxha, ka urdhëruar menjëherë inspektoratin e Ministrisë së Drejtësisë të bëjë inspektim të këtij rasti, respektivisht pretendimeve te cilat përmenden në shkrimet e portaleve.

“Pas pranimit të raportit të Inspektoratit të Shërbimit Korrektues, në varësi nga të gjeturat dhe rekomandimet si dhe në pajtim me dispozitat ligjore në fuqi, Ministria e Drejtësisë do të ndërmarrë veprimet e duhura”, thuhet në njoftmin e MD.

Ministrja e Drejtësisë, Hoxha shpreh përkushtimin si dhe garanton qytetarët e Republikës së Kosovë se puna e Ministrisë së Drejtësisë dhe e institucioneve të cilat veprojnë në kuadër të saj do të jetë transparente dhe në pajtim me legjislacionin në fuqi dhe nuk do të tolerohet asnjë praktikë që nuk është në pajtim me ligjin.(rtk)