Ministria e Enver Hoxhajt i del në mbrojtje Albin Kurtit

26.09.2016 19:47

Pavarësisht raporteve politike jo të mira, ministri i Punëve të Jashtme të Kosovës, Enver Hoxhaj i ka dalë në mbrojtje ish-liderit të Vetëvendosjes, aktualisht deputet i Kuvendit të Kosovës Albin Kurtit. Ministria që drejtohet nga Hoxhaj, ka kërkuar sqarim nga Ambasadori maqedonas në Prishtinë për atë që e ka cilësuar si gjuhë tendencioze në fushatën parazgjedhore në raport me Kosovën dhe personalitete të saj.

Ministria e Enver Hoxhajt i del në mbrojtje Albin Kurtit

Kurti e Hoxhaj kanë shkëmbyer më parë deklarata akuzuese ndaj njëri-tjetrit, dallimet politike të tyre tanimë janë të ditura, mirëpo as kjo nuk i ka ndalur ata që të bashkohen në një qëndrim kundër “fushatës tendencioze në Maqedoni, kundër shtetit të Kosovës dhe personaliteteve të saj”.

Reagimi i MPJ-së erdhi pas deklaratave nacionaliste të deputetëve të VMRO-DPMNE në Parlamentin e Maqedonisë dhe mediave maqedonase ku janë apostrofuar emrat e Gjeneralit Kadri Kastrati dhe deputetit të Kuvendit të Kosovës, Albin Kurti.

“Ministria e Punëve të Jashtme e Kosovës sot ka kërkuar sqarim nga Ambasadori i Maqedonisë në Prishtinë për zhvillimet e dy ditëve të fundit në shtetin fqinj, ku për qëllime ditore të fushatës parazgjedhore atje po apostrofohen personalitete nga Kosova dhe emri i shtetit të Kosovës”, thuhet në njoftimin për media të MPJ-së.

Në kërkimin e sqarimit për Ambasadorin nga ana e Drejtorit të Përgjithshëm të MPJ-së, Albert Prenkaj është shtruar nevoja që të ketë zyrtarisht një përgjigje nga shteti i Maqedonisë përkitazi me një gjuhë aspak demokratike që nuk i shërben ruajtjes dhe kultivimit të marrëdhënieve shumë të mira miqësore mes Kosovës dhe Maqedonisë.

“MPJ kërkon nga partitë politike maqedonase, dhe politikanët në pushtet ta shmangin Kosovën dhe personalitetet e saj nga fjalori i përditshëm i fushatës parazgjedhore dhe që të ruajnë edhe më tej frymën e mirë të bashkëpunimit si dy shtete fqinje”, thuhet në njoftim. /Insajderi.com