Martesa në mes të një çifti në Dubai ka zgjatur më pak se 15 minuta, si rezultat i një mosmarrëveshjeje në mes të dhëndrit dhe babait të nuses, i cili e kishte me nxitim t’i merrte paratë për çmimin e vajzës.
Dhëndri u pajtua që t’i paguajë 20 mijë euro babait të nuses, ai pagoi pjesën e parë, ndërsa gjyqtari kishte vendosur që pjesën tjetër të pagesës ta kryente pas martesës, përcjell KPress.
Mirëpo, babai i nuses kishte dyshime në këtë gjë, dhe nuk e lejonte burrin e sapomartuar të dilnte nga vetura për të shkuar t’i merrte paratë.
Ai i kërkoi dhëndrit që ta dërgonte një të afërm për t’i marrë paratë, duke refuzuar që të priste disa minuta, por dhëndri u ndje i fyer dhe menjëherë u divorcua nga gruaja.
Avokati që kërkoi të mos i publikohet emri ka thënë se dhëndri u ndje i fyer dhe përçmuar nga vjehrri i tij, dhe kështu i tha se nuk e dëshiron vajzën e tij për grua, dhe u divorcua në më pak se 15 minuta pas nënshkrimit të kontratës martesore.
