Një ditë para mbajtjes së seancës së Kuvendit të Kosovës ku do të zgjidhet presidenti i ri shtetit, Lëvizja për Bashkim ka bërë thirrje qytetarëve të Kosovës të jenë gjakftohtët edhe përkundër situatës së acaruar politike në vend.
‘’Qytetarët kanë të drejtë të pamohueshme të protestojnë e të festojnë, por rasti konkret përbën një rrezik për gjakderdhje e vëllavrasje, sidomos duke e pasur parasysh gjendjen tejet të acaruar politike në të cilën jemi’’, thuhet në komunikatë për media.
Lëvizja për Bashkim bën thirrje të gjithë liderëve politikë që të jenë në nivelin e detyrës si dhe gjithë qytetarëve që të kenë kujdes maksimal dhe të mos bien pre e asnjërës palë.
Nesër në ora 11 pritet që të fillojë seanca e jasshtëzakonshme e Kuvendit të Kosovës ku pritet të zgjedhet presidenti i pestë i vendit. Për të kundërshtuar këtë, tri partitë opozitare kanë bërë thirrje për protesta popullore
‘’Lëvizja për Bashkim u bën thirrje policisë së Kosovës që ta ruajnë rendin e ligjin, ndërsa qytetarët që të mos pozicionohen në asnjërën anë. Lëvizja për Bashkim gjithashtu iu bën thirrje të dyja palëve që ta rishqyrtojnë mbajtjen e organizimeve në të njëjtin vend e në të njëjtën kohë. E pakta që mund ta bëjnë është që organizimet e tyre t’i bëjnë në hapësira të ndryshme, larg kontaktit me njëri-tjetrin’’, thuhet në komunikatë./Insajderi
