Kryetari i Lëvizjes “Besa” në Maqedoni që në këto zgjedhje është partia më e re shqiptare, Bilall Kasami, ka kundërshtuar akuzat e partive të tjera shqiptare e kanë lidhur partinë e tij me fenë, përkatësisht atë myslimane.
Sipas tij, Besa nuk ka të bëjë me islamin.
“Kur akuzojnë një lëvizje politike me orientim kombëtar, e cila vetëm që e ka parashtruar në të zezë në të bardhë tek platforma e saj se beson në Zot, dhe se mbështetemi në parimin e vlerave të Zotit dhe vlerave kombëtare, është e padrejtë dhe e pamoralshme”, ka thënë Kasami për Zërin e Amerikës.
Ai ka folur edhe për financimin e partisë së tij.
“Besimi në Zot, nuk është besim ekskluziv i myslimanëve. Sa i përket financimeve kemi dorëzuar raportin dhe nuk kemi pasur ndonjë vërejtje. Jemi subjekti më i pastër në këto zgjedhje. Lëvizjen Besa financojnë të gjitha ata që kanë financuar luftën e vitit 2001 dhe çdo projekt kombëtar në Maqedoni”, ka thënë Kasami.
