Kuvendi i Kosovës ka njoftuar se nesër do të mbahet mbledhja e Kryesisë, në të cilën është paraparë të procedohet si pikë e rendit të ditës Projektligjit nr. 05/L-156 për Forcën e Sigurisë së Kosovës.
Këtë projektligj sot e ka dorëzuar në Kuvend presidenti Hashim Thaçi, për të proceduar me ndryshimet e nevojshme që kanë të bëjnë me ndryshimin e kapaciteteve të FSK-së që ajo të bëhet sa më shpejt ushtri.
Meqë kjo nuk po arrihet me ndryshime kushtetuese, ashtu siç ishte paraparë, për shkak të kundërshtimit të vazhdueshëm të deputetëve të Listës Serbe, atëherë, përmes këtij projektligji synohet të arrihet qëllimi.
Emri i FSK-së me këtë projektligj do të mbetet i njëjtë, por vetëm do të rriten kapacitetet e saj.
Në parim, të gjitha partitë politike e kanë mbështetur nismën e presidentit Thaçi.
Mbledhja do të mbahet nesër prej orës 10:00./Insajderi.com
