Kryeministri i Republikës së Kosovës, Isa Mustafa, priti në takim Arqipeshkvin e Selisë së Shenjtë, Monsinjor Vincenzo Paglia.
Gjatë takimit, kryeministri Mustafa e falënderoi për përkrahjen e Kosovës në etapa të ndryshme, duke veçuar mbështetjen dhe marrëdhëniet që Kosova dhe Selia e Shenjtë kanë vendosur dekada më parë, nën udhëheqjen e Presidentit Historik të Kosovës, Dr. Ibrahim Rugova.
Duke e njoftuar për proceset aktuale dhe progresin në Kosovë, kryeministri Isa Mustafa, shprehu përkushtimin për thellimin e marrëdhënieve bilaterale me Selinë e Shenjtë, duke kërkuar përkrahjen e Arqipeshkvit Paglia, në këtë drejtim.
Nga ana e tij, Arqipeshkvi i Selisë së Shenjtë, Monsinjor Vincenzo Paglia, u shpreh i lumtur me këtë vizitë në Kosovë, duke vlerësuar të arriturat e deritashme.
Duke folur për proceset nëpër të cilat ka kaluar Kosova, Aqipeshkvi Paglia, shprehu përkrahje të mëtejshme për Kosovën.
Gjatë takimit, u bisedua edhe për tolerancën tradicionale ndërfetare në Kosovë dhe për përkushtimin në avancimin e mirëqenies, shëndetit dhe kualitetit të jetës së të gjithë qytetarëve të Kosovës.
