Përfaqësuesja e Kosovës ka shënuar fitoren e parë të këtij viti, duke e mposhtur Letoninë në miqësore.
Kosova ka shënuar fitoren e parë në vitin 2017, pasi e mposhti Letoninë në miqësoren në “Adem Jashari”, raporton Insajderi.
Në ndeshjen e parë që prej largimit të selektorit Albert Bunjaku, Kosova shënoi fitore me rezultat 4:3, duke realizuar golin e fitores në minutat shtesë.
Nën drejtimin e trajnerit Muharrem Sahiti, përfaqësuesja barazoi tri herë rezultatin, për ta fituar ndeshjen në çastet e fundit të takimit.
Letonia fillimisht kaloi në epërsi në minutën e 11, derisa Amir Rrahmani barazoi për 1:1, vetëm dy minuta më vonë.
Mysafirët pas gjysmë ore lojë realizuan sërish për epërsinë 2:1, para se Kosova të barazonte me anë të sulmuesit Vedat Muriqi, në fundin e pjesës së parë.
Në pjesën e dytë, Letonia realizoi sërish pas afro një ore lojë, kurse Kosova barazoi në minutën e 86-të me anë të Elbasan Rashanit.
Golin e fitores të Kosovës e shënoi në minutat shtesë të ndeshjes mesfushori Besar Halimi, për rezultatin përfundimtar 4:3.
Kjo është fitorja e dytë në një ndeshje zyrtare për Kosovën që prej pranimit në UEFA dhe FIFA, dhe e para që nga fitorja ndaj Ishujve Faroe, në qershor të 2016-tës. /Insajderi
https://www.youtube.com/watch?v=gzejX7TGHxA
https://www.youtube.com/watch?v=EEYo5n4sL8A
https://www.youtube.com/watch?v=xMqc4RrzXVM