Xhevdet Haskaj pushimin veror e kishte planifikuar ta marrë më vonë. Por, atij iu desh ta nisë pushimin nga e marta e kësaj jave, pasi i duhet të kujdeset për vajzën e tij tri vjeçe, e cila deri më 15 gusht do të jetë në pushim nga çerdhja.
Tiara Haskaj, është e regjistruar në institucionin parashkollor “Yllkat” në Prishtinë, i cili do të pushojë deri në gjysmën e muajit të ardhshëm, sikurse të gjitha çerdhet tjera publike të kryeqytetit, raporton KTV.
Megjithatë, Xhevdet Haskaj thotë se pas 2 javësh duhet ta bëjë një zgjidhje për ta dërguar Tiarën nëpër familjarë, në pamundësi që të pushojë nga puna për 1 muaj.
Sipas zyrtarëve komunalë, vendimi që institucionet parashkollore të pushojnë një muaj, është marrë pas kërkesave të udhëheqësve të tyre.
Komuna e ka arsyetuar vendimin për pushim me faktin se, gjithashtu, ka pasur nevojë urgjente që të pastrohen objektet e çerdheve, ndërsa për vitet e ardhshme paralajmërojnë se do të ketë diskutime më të gjera para se të merret ky vendim.
