Këshilli për Mbrojtën e të Drejtave e të Lirive të Njeriut (KMDLNj) ka ftuar qytetarët e Kosovës të mos e paguajnë energjinë elektrike në shumën e faturuar, por ta paguajnë vetëm 70% të shumës së faturuar.
Pas kësaj deklarate të KMDLNJ-së, Insajderi ka kontaktuar me zëdhënësin e KEDS, Viktor Buzhala.
Buzhala ka thënë se i vetmi entitet që rregullon operimet e kompanisë KEDS, është Zyra e Rregullatorit të Energjisë (ZRRE).
“Ne kemi aplikuar të gjitha politikat dhe vendimet nga institucionet relevante dhe do të vazhdojmë të veprojmë njëjtë. Entiteti përgjegjës që rregullon operimet tona është ZRRE, dhe ne do të aplikojmë çdo vendim që vije nga ky institucion”, ka thënë Buzhala.
KMDLNJ ka kërkuar që të zbatohet vendimi i Gjykatës së Apelit për ndërprerje të faturimit diskriminues, në baza etnike.
“Si hap të parë, KMDLNj-ja propozon që të zbatohet vendimi i Gjykatës së Apelit për ndërprerje të faturimit diskriminues, në baza etnike, kurse, si hap të dytë, deri të bëhet një zgjidhje përfundimtare dhe në përputhje me vendimin e formës së prerë të Gjykatës së Apelit, KMDLNj-ja i fton qytetarët e Kosovës të mos e paguajnë energjinë elektrike në shumën e faturuar por ta paguajnë vetëm 70 % të shumës së faturuar”, thuhet ndër tjera në komunikatën e KMDLNj-së. /Insajderi.com
