Klubi i Basketbollit “Bashkimi” nga Prizreni ka bërë shkelje ligjore kur të dielën mbështeti publikisht kandidatin e Partisë Demokratike të Kosovës (PDK) për kryetar të Komunës së Prizrenit, Shaqir Totaj.
Kandidati i PDK-së në Prizren është edhe kryetar i klubit të basketbollit.
“KB Bashkimi”, përmes një njoftimi të lëshuar në rrjetin social Facebook, ka thënë se “besojmë që Totaj të udhëheq me të dyja bashkë: me klubin dhe qytetin”.
“Ashtu siq i besum vite më parë të na udhëheq tash e sa kohë me dashurinë tonë të përjetshme BASHKIMI-n ashtu i besojmë dhe e motivojmë edhe sot që të udhëheq me të dyja bashkë, klubin dhe qytetin! Të parit të klubit i dëshirojmë shume suksese në sfidën e re!”, shkruhej në njoftim.
Në fund të njoftimit bëhej e ditur se këtë mbështetje të hapur ndaj kandidatin politik për zgjedhjet lokale në Prizren, e ka pranuar edhe Kryesia e “KB Bashkimit”.
Por, “KB Bashkimi” ka bërë shkelje të ligjit kur mbështeti publikisht kandidatin e PDK-së për kryetar të Prizrenit, Shaqir Totajn. KB “Bashkimi”, si shumica e klubeve sportive në Kosovë, është i regjistruar dhe funksionon si organizatë jo-qeveritare, raporton Insajderi.
Dhe sipas nenit 15 të Ligjit për Lirinë e Asociimit, OJQ-të nuk mund të angazhohen në mbështetje të partive politike, apo kandidatëve politik.
“OJQ-të nuk mund të angazhohen në mbledhje fondesh ose në fushata për të mbështetur partitë politike ose kandidatët për funksione politike, dhe as nuk mund të propozojnë, regjistrojnë ose në ndonjë mënyrë të mbështesin kandidatët për poste publike”, thuhet në Ligjin për Lirinë dhe Asociimin, në nenin e 15-të të saj.
Përveç shkeljes së hapur ligjore, Kryesia e “KB Bashkimi” është kritikuar edhe për përdorjen e klubit në fushatë politike. Është kritikuar se ka “keqpërdorur vlerën e përbashkët të qytetit, për qëllime politike”.
“Askush, pra asnjë individ e asnjë Kryesi nuk e ka të drejtën e keqpërdorimit të klubit, i cili i takon krejt qytetit dhe qytetarëve të Prizrenit. KB ‘Bashkimi’ është simbol i traditës sportive të Prizrenit dhe askush nuk guxon ta keqpërdorë atë për qëllime partiake”, ka thënë Hajrulla Ceku, aktivist i shoqërisë civile.
Shaqir Totaj u zyrtarizua si kandidat i PDK-së në Prizren më 22 gusht. /Insajderi.com
