Kryetari i Komunës së Gjilanit, Lutfi Haziri ka mësuar zyrtarisht emrin e njërit prej kundër kandidatëve të tij për kreun e komunës. Ai do të jetë Sami Kurteshi, i kandiduari nga Lëvizja Vetëvendosje.
Lëvizja Vetëvendosje ka njoftuar se deputeti dhe anëtari i kryesisë së kësaj Lëvizjeje, Sami Kurteshi ka marrë besimin e aktivistëve të Gjilanit për të qenë kandidat për kryetar të Gjilanit, në zgjedhjet lokale të 22 tetorit.
“Zotin Kurteshi e urojmë për rezultatin në procesin zgjedhor të brendshëm dhe i urojmë suksese edhe në garën për kryetar komune”, thuhet në njoftimin e VV-së.
Deputeti i VV-së, i zgjedhur si deputet i Kuvendit të Kosovës nga zgjedhjet qëndrore të 11 qershorit, nuk pritet të jetë i vetmi deputet që do të sfidojë kryetarin Haziri. Edhe Zenun Pajaziti nga Partia Demokratike e Kosovës (PDK) pritet të jetë kundër-kandidat i Hazirit dhe Kurteshit në Gjilan.
Shefi i grupit parlamentar të PDK-së, pasardhësi i Adem Grabovcit, Zenun Pajaziti, do të jetë sipas të gjitha gjasave kandidati i PDK-së për kryetar të Gjilanit.
Lajmin e kishte bërë të ditur vet Pajaziti në televizionin Tribuna Channel duke thënë se përkundër faktit se Partia Demokratike e Kosovës ende nuk ka bërë ndonjë listë zyrtare me kandidaturat për kryetar komunash, megjithatë ai është angazhuar që të rikthejë fuqinë e kësaj partie në Gjilan.
