Rrjeti i madh social, Facebook, ka thënë se përpjekjet për përdorimin e inteligjencës artificiale dhe teknikave të tjera automatike për të fshirë postimet lidhur me terrorizmit, kanë sjellë fryte, por duhet akoma më shumë punë.
Kompania ka thënë se 99 për qind të materialit që ka fshirë ishte për organizatën “Al Qaeda” dhe Shtetin Islamik.
Megjithatë, kompania thotë se është e vetëdijshme që i duhet më shumë punë për të identifikuar grupe të tjera, transmeton Albinfo.ch.
Themeluesi, Mark Zuckerberg kishte dhënë detajet e para për planin e bazuar në inteligjencën artificiale në muajin shkurt. Atë kohë ai kishte thënë se duhen disa vjet që të zhvillohen në plotësi sistemet e kërkuara.
Facebooku bazohet në një miks të shikimeve të përdoruesve dhe softuerëve për të konfirmuar se cilat postime duhet të largohen, por thotë se detyra tani varet kryesisht nga sistemet automatike.
Rrjeti social thotë se teknologjitë përdorin kombinimin e fotografive dhe videove për të identifikuar pamje të përdorura nga grupe terroriste për t’i fshirë përmbajtjet e caktuara.
Facebooku ishte kritikuar ashpër nga shumë shtete për “promovim” të terroristëve. Në tetor, në Gjermani kishte hyrë në fuqi një ligj që i mundësonte qeverisë të gjobiste rrjetet sociale deri në 50 milionë euro nëse nuk arrijnë t’i heqin postimet e dhunshme brenda 24 orëve.
