Belgjika është tmerruar nga skandali i mishit të prishur. Të gjithë janë në këmbë: prokurorët, parlamentarët e qeveritarët. Këtu askush nuk është në këmbë. Asnjë qeveritar e asnjë deputet. Derisa shteti nuk lëviz, shitësit e mishit të prishur do të vazhdojnë të imagjinojnë skenare frikësimi për gazetarët, ku do të përfshihet sharritja me kallashnikov
Ishin bërë pesë ditë prej se kishim publikuar emrin e kompanisë kosovare të përshirë në skandalin e mishit që përfshinte Belgjikën dhe Kosovën. Derisa shteti belg ishte ngritur në këmbë, në Kosovë pushtetarët nuk e kanë bërë ende asnjë hap.
Mosndërmarrja e masave nga shteti i dobët i kishte dhënë guxim biznesmenit nga Rahoveci. Kishte telefonuar në redaksi të Insajderit.
“…se me ju q.. nanën e marrë vet kallashnikovin edhe duhet me ju sharritë krejt, rrapa rrapa”, ishte “selami” Anton Jupës. Kishte folur si bandit për të frikësuar gazetarët. Zgjodhëm t’i kundërvihemi.
Ne e bëmë publik kërcënimin e tij dhe e raportuam në polici. Kompania e tij “Euro Ida”, ishte e kontraktuar nga kompania “Veviba”.
Për dallim prej Kosovës, pronari i kompanisë belge nuk ka kërcënuar ende asnjë medium që ka raportuar për skandalin e mishit të prishur.
Nuk guxon ta bëjë këtë. Nuk operon në një vend, i cili udhëhiqet nga një klasë politike e korruptuar.
Për dallim prej Kosovës, Belgjika është tmerruar nga skandali i mishit të prishur. Të gjithë janë në këmbë: prokurorët, parlamentarët e qeveritarët.
Por, çfarë po ndodh në Kosovë?
Ne këtu jemi më të rrezikuar se sa belgët. Ishte paraparë që ne ta hamë atë mish.
Këtu askush nuk është në këmbë. Asnjë qeveritar e asnjë deputet. Nuk e kanë thënë asnjë fjalë. Prokurorët, drejtues të Doganës e AVUK-ut e bënë të kundërtën. Nuk pranuan ta bëjnë publik emrin e kompanisë kosovare që në vitin 2016 kishte tentuar që të na helmonte neve, qytetarëve të Kosovës.
Ata mbrojnë interesat e banditëve e kriminelëve, të cilët për interes të përfitimit material janë në gjendje të helmojnë me mish të prishur të gjithë qytetarët e Kosovës.
Në skandalin e mishit të prishur nuk i është i përfshirë vetëm biznesmeni nga Rahoveci. Ka arsye se pse parlamenti në Kosovë nuk diskuton për këtë skandal, siç vepron parlamenti në Belgjikë.
Arsyeja është Ramiz Kelmendi, pronari i korporatës “Elkos Group” dhe deputeti i partisë opozitare, LDK-së. Muajin e kaluar, inspektorët zbuluan një sasi prej 550 kilogramësh mish të prishur.
Sasi të njëjtë të mishit të prishur, inspektorët zbuluan edhe në kompaninë “Viva Fresh”, pronë e multimilionerit nga Shtimja, Xhevdet Rexhepit.
Ky mish në sasi prej mbi 1 tonësh është asgjësuar, por askush nuk rrezikon dënimin me burg për shkak të përfshirjes në këtë skandal. Rasti do të minimizohet nga autoritetet shtetërore. Të ndikuar nga multimilionerët e fuqishëm, prokurorët e gjyqtarët do t’i shpallin të pafajshëm.
Këto janë vetëm disa nga rastet kur kompanitë ofrojnë mish të prishur për konsumatorët e tyre. Numri i tyre është shumë i madh dhe ata mund të ndalohen vetëm nga shteti, nëse vendos që të tregojë dhëmbët për interes të qytetarëve..
Për pushtetarët nuk përbën kurrfarë rëndësie rreziku i helmimit të popullsisë nga mishi i prishur. Ata, pushtetarët, nuk janë të rrezikuar personalisht. Ata nuk janë target i ofertave të kompanive private që e nxjerrin mishin e prishur me çmim jashtëzakonisht të lirë. Pre e këtyre ofertave janë të varfrit.
Kjo kastë biznesmenësh do të vazhdojë të përfitojë në kurriz të tyre. Do të shfrytëzojë shtetin e dobët. Derisa nuk kanë telashe me shtetin atëherë do të merren me gazetarët.
Në kokën e tyre do të imagjinojnë skenare frikësimi për gazetarët, ku do të përfshihet sharritja me kallashnikov.
