Dënohet shqiptarja që la fëmijët në Gjermani

29.03.2017 21:16
Dënohet shqiptarja që la fëmijët në Gjermani

La fëmijët e mitur në Gjermani për t’u siguruar një jetë më të mirë, por pas kthimit në Shqipëri u dënua për braktisje të fëmijëve.

E tillë është historia e 44-vjeçares, Miranda Loçka, e cila është dënuar nga Gjykata e Tiranës me 4 muaj burgim, por duke ja pezulluar vuajtjen e dënimit me shërbim prove për 18 muaj, njofton Top Channel.

44-vjeçarja është denoncuar nga Policia Kufitare, e cila konstatoi kthimin e saj nga Gjermania pa katër fëmijët, me të cilët kishte dalë nga vendi ynë. Si gjatë hetimeve, ashtu edhe gjatë gjykimit, e pandehura e pranoi vetë faktin e lënies së fëmijëve në Gjermani.

“Fëmijet i kam lënë vetë me dashje në azil në dhomën ku qendroja në fshatin Ferne të komunes Sellzkoten ne Gjermani dhe jam kthyer në Shqipëri, duke menduar se atyre mund t’u krijoheshin kushtet për një jetë më të mirë”, ka thënë ajo.

Pavarësisht qëllimit të shprehur, gjykata e ka cilësuar braktisjen e fëmijëve si një veprim me rrezikshmëri shoqërore, pasi cenon marrëdhëniet juridike të vendosura për të mbrojtur dhe garantuar institucionin e familjes, si edhe mirërritjen dhe edukimin e fëmijëve.

Gjithashtu, gjykata e ka cilësuar këtë vepër edhe si prishje të imazhit të shtetit dhe shoqërisë shqiptare. Por, pranimi i fajit dhe pendesa e treguar gjatë gjykimit, e shtynë gjykatën që dënimin me burgim t’ja pezullojë në shërbim prove prej 18 muajsh.