Kryetarja e Komisionit Qendror të Zgjedhjeve, Valdete Daka, që njëkohësisht është edhe gjyqtare në Gjykatën Supreme, ka arsyetuar daljen në publik të saj me Ferdije Zhushin, e cila akuzohet për korrupsion në Agjencinë e Akreditimit në Kosovë.
Në një prononcim për Insajderin, Daka ka thënë se me Zhushin ka një shoqëri të vjetër dhe se për më tepër ajo nuk është shpallur e fajshme për akuzat që e rëndojnë.
“Unë Ferdije Zhushin e kam shoqe që 50 vjet, e njoh prej fëmijërisë. Kemi qenë në klasë bashkë, jemi rritur bashkë. Jemi shoqëru, e vazhdojmë ende shoqërinë”, tha Daka.
Daka ka deklaruar se nuk e konsideroj jo etike këtë paraqitje në publik, madje ajo thotë se nuk mund t`i ndërpres lidhjet shoqërore edhe familjare që i ka me të.
“Po mendoj që është etike. Nëse ajo ka lëndë, e ka lëndën në Gjykatën Themelore të Prishtinës, edhe unë nuk kam të bëjë asgjë me Gjykatën Themelore të Prishtinës. Unë bile kam pasë rast kur m`ka ra një kërkesë e saj për mbrojtje të ligjshmërisë, më ka rënë mua. Po unë kam kërkuar përjashtimin edhe jam përjashtuar, edhe nuk jam vendosë në atë lëndë”, tha Daka.
Daka, tha se fotografimi i saj është bërë qëllimshëm për shkak të ankesës në rastin e zgjedhjes së Kryetarit të Gjykatës së Supremes.
“Janë tuj ba linqim të njerëzve qëllimisht. Kjo është e qëllimshme e qitne, mu për shkak të rastit që është këto ditë, që jam e përfshirë në zgjedhjen e Kryetarit të Gjykatës Supreme. Këtë dikush qëllimisht është duke e ba. Si me më pas përcjellë, se tash e pash unë, gjithë ato fotografi”, tha Daka.
Në media u publikuan gjatë ditës fotografi ku shihet Daka së bashku me Zhushin në një lokal në Prishtinë. /Insajderi.com
