Berisha i ofron Ollurit postin e këshilltarit për gjuhë shqipe

Gabimet e shumta drejtshkrimore të deputetit të NISMA-s, Zafir Berisha, kanë qenë temë edhe në emisionin Debat D+ ku ai ka qenë i ftuar së bashku me deputetin tjetër të kësaj partie, Haxhi Shala.

Berisha, që vjen nga Prizreni, është thumbuar nga drejtori ekzekutiv i Insajderit, Parim Olluri, i cili ka kritikuar për mungesën elementare të gjuhës shqipe e cila reflektohet tek fjalimet e Berishës në Kuvend, shkrimet e tija autoriale në media dhe deri tek statuset te tija në Facebook.

Pikërisht gabime të tilla ka pasur edhe në statusin e tij të fundit, që paralajmëronte praninë e tij në emision.

Olluri ia përmendi përsëri gabimet dhe kjo ka bërë që deputeti Berisha t’i bëjë ofertë atij.

“Unë nuk jam profesor i gjuhës shqipe, i thash edhe këtij, por kur të vi në Qeveri do të marr këshilltar”, ka thënë Berisha duke iu drejtuar Ollurit.

E kjo ka shkaktuar të qeshura në studio, ndërsa Olluri ka komentuar me ironi.

“Një post pra e fitova”, ka thënë ai.

Në debat për drejtshkrimin e Berishës ka komentuar edhe analisti Imer Mushkolaj.

“Për Berishën e dimë që ka gabime drejtshkrimore me tonelata”, ka thënë Mushkolaj./Insajderi.com