Arrestimi i nënkolonelit Nehat Thaçi, drejtor rajonal i Policisë së Kosovës në Mitrovicë, nga ana e autoriteteve të Serbisë po trajtohet nga ministria për Dialog në kuadër të bisedimeve me Beogradin në Bruksel.
Zëvendësministri i Punëve të Jashtme, Valon Murtezaj ka thënë se me çështjen e Thaçit po merret ministria për Dialog.
Nga Brukseli, ministrja Edita Tahiri u ka bërë thirrje autoriteteve të Beogradit që të lirojnë Thaçin, i cili po mbahet në paraburgim nën “akuzën për terrorizëm”.
Pritjet e qeverisë së Kosovës janë që me këtë çështje të merret edhe Bashkimi Evropian, si lehtësues në bisedimet ndërmjet Prishtinës dhe Beogradit.
Ministria e Punëve të Brendshme të Serbisë ka konfirmuar njoftimet se policia ka arrestuar Nehat Thaçin, nga Ferizaj, në bazë të “fletarrestit të lëshuar me urdhër të Gjykatës së Lartë në Nish për veprën penale të terrorizmit”.
Në kumtesën e Ministrisë thuhet se “Thaçi u arrestua të mërkurën në mbrëmje rreth orës 20 në vendkalimin administrativ Konçul, gjatë lëshimit të vërtetimit për hyrje në territorin e Serbisë Qendrore”.
“Në bazë të vendimit të Gjykatës së Lartë në Nish për përcaktimin e paraburgimit nga viti 2010, Thaçi është dërguar në njësinë e paraburgimit”, thuhet në kumtesën e Ministrisë së Brendshme të Serbisë.
Gjatë ditës, Qeveria e Kosovës është treguar e përmbajtur duke mos reaguar pas arrestimit të Thaçit. Ndërkohë që edhe misioni i Bashkimit Evropian për Sundim të Ligjit – EULEX, nuk është përfshirë në këtë rast.
Zëdhënësja e EULEX-it, Besa Domi ka thënë për Radion Evropa e Lirë se ky mision nuk është përfshirë në rastin Thaçi.
Ndërkohë, në formën individuale, ka reaguar zëvendësministri i brendshëm, Nehat Mustafa përmes një shkrimi në rrjetin social Facebook.
Ai mes tjerash ka ftuar Kuvendin e Kosovës që të reagoj ndaj arrestimit të nënkolonelit të policisë së Kosovës nga ana e autoritete serbe.
“Mbrëmë nga policia e Serbisë është arrestuar nënkolonel, Nehat Thaçi – Drejtor i Policisë në Mitrovicë. Ai po akuzohet për terrorizëm, akuzë kjo me të cilën Serbia ka akuzuar e do të vazhdojë t’i akuzojë të gjithë shqiptarët”, ka shkruar Mustafa.
[iframe id=”https://www.facebook.com/plugins/post.php?href=https%3A%2F%2Fwww.facebook.com%2Fpermalink.php%3Fstory_fbid%3D2112818145610784%26id%3D1950195471873053&width=500″]
Më pas, ai u është drejtuar deputetëve, duke shprehur habinë e tij me heshtjen që po mbretëron në Kuvend për këtë rast, pavarësisht se po mbahet seancë plenare.
“Institucionet tjera po bëjnë punën e tyre lidhur me këtë rast, por Ju po heshtni. Folni more e mos u ndini komod, sepse me akuza të tilla jeni akuzuar e mund të akuzoheni nga Serbia në të ardhmen edhe ju!”, ka shkruar Mustafa.
Në bazë të njoftimeve të dhëna nga Ministria e Brendshme e Serbisë, Thaçi do të duhej të paraqitej përpara gjykatës gjatë ditës së enjte, më 29 shtator.
Arrestohet drejtori rajonal i Policisë së Kosovës – kërkohen sqarime nga Serbia
Policia serbe ka arrestuar drejtorin rajonal të Policisë së Kosovës të rajonit të Mitrovicës së Jugut, Nehat Thaçi, i ka konfirmuar lajmin Radios Evropa e Lirë, zëdhënësi i Policisë së Kosovës, Daut Hoxha.
Arrestimi, tha Policia e Kosovës, ka ndodhur pak pas mesnatës së 28 shtatorit në vendkalimin kufitar “Dheu i Bardhë” në magjistralen Gjilan-Bujanoc.
Zëdhënësi Hoxha tha se “Policia e Kosovës nuk ka asnjë sqarim nga autoritet serbe për arsyet e arrestimit të drejtorit rajonal të Policisë” dhe bëri me dije se “përmes autoriteteve kompetente të EULEX-it është kërkuar sqarim zyrtar për arsyet e arrestimit nga pala serbe”.
Sipas njoftimit të zëdhënësit Hoxha “drejtori rajonal Policisë, Nehat Thaçi, në momentin e arrestimit ishte jashtë detyrës së tij zyrtare dhe së bashku me një shokun e tij po udhëtonte për çështje private nëpër territorin e Serbisë për në shtetet perëndimore”. (REL)
