Aktakuzë për posedim të narkotikëve

14.03.2017 12:03
Aktakuzë për posedim të narkotikëve

Prokuroria Themelore ne Prizren ka ngritur aktakuzë kundër të akuzuarës A.Sh., për shkak të dyshimit se ka kryer veprën penale, blerja, posedimi, shpërndarja dhe shitja e pa autorizuar e narkotikëve, substancave psikotrope dhe analoge.​

Sipas aktakuzës, e pandehura A.Sh.  me datë 17 janar 2017, në pikën kufitare të Vërmicës, është gjetur se pa autorizim ka transportuar me qëllim të shitjes apo të shpërndarjes substanca psikotrope të llojit  marihuanë të cilët me ligj janë shpallur si narkotik.

“Pas ndalimit të akuzuarës A.Sh. në pikën kufitare të Vërmicës, në hyrje nga Shqipëria për në Kosovë dhe pas kontrollimit të detajuar i është gjetur një qese e madhe prej letre, pronë e të akuzuarës e cila në brendi kishte dy paketime me lëndë psikotropike të llojit marihuanë me një peshë prej 1.152,91 gram dhe 860.34 gram si dhe një qese e vogël me peshë 3.32 gram, me peshë të përgjithshme prej 2.016,57 gram”, thuhet në njoftimin e prokurorisë.

Pas ekzaminimit të mostrave në laborator të këtyre sasive të gjetura tek e akuzuara, prokuroria thotë se është vërtetuar se lëndët narkotike janë të llojit kanabis (marihuanë).

“Me këto veprime e akuzuara A.Sh. ka kryer veprën penale blerja, posedimi, shpërndarja dhe shitja e pa autorizuar e narkotikëve, substancave psikotrope dhe analoge nga neni  273 paragrafi 2 të KP-ës”, thuhet në fund të njoftimit./Insajderi.com