Kryetari i Prishtinës, Shpend Ahmeti në emisionin “Interaktiv” të KTV-së ka theksuar se presidenti i vendit nuk përfaqëson unitet.
Sipas tij, Hashim Thaçi në mënyrë direkte po ndikon në shtrembërimin e rezultateve zgjedhore.
Ai tha se i pari i vendit, po shkon edhe në plazhet e Shqipërisë, që t’i bind deputetët dhe të kthehen në Kosovë dhe ta votojnë Qeverinë.
Sipas tij, e pamë që presidenti Thaçi është në shërbim të PAN-it.
“Ai sot ditën u takua në një restuarant me Daut Haradinajn, e pastaj edhe me Ramush Haradinajn”, tha ai.
Ahmeti tha se PDK sërish do ta lë me “gishta në gojë” liderin e AAK-së, Ramush Haradinajn.
“Po shihet se edhe për të katërtën herë, PDK po përgatitet që t’ia luaj sërish lojën Ramush Haradinajt”, tha ai në emisionin “Interaktiv” të KTV-së.
Ai tha se PAN nuk mund ta formoj qeverinë, sepse nuk i ka numrat.
“Ata mund ta formojnë qeverinë vetëm nëse e blejnë ndonjë deputet, ose nëse e kontrabandojnë dhe se kjo nuk është aspak demokratike”, tha ai.
Ahmeti ka thënë se AAK e Nisma duhet të ç’kapen nga PDK-ja.
