Këshilli Drejtues i Partisë së Drejtësisë nga mbledhja e 3 shtatorit 2016, bazuar në statutin e saj doli me vendimin për thirrjen e Kuvendit të Jashtëzakonshëm zgjedhor.
“Ky qëndrim i Këshillit Drejtues (03.09.2016) u rikonfirmua edhe në mbledhjen e 21 shtatori 2016, ku pjesëmarrës ishin 17 degë, nga 24 sa janë gjithsej, të cilat po kërkojnë ndryshime në udhëheqjen e partisë, ku të pranishëm ishin edhe nënkryetarët Jeton Svirca dhe deputetja Labinotë Demi-Murtezi si dhe Sekretari i Përgjithshëm Fidan Mustafa, e në të cilin u vendos që të bëhen përgatitjet e duhura për mbajtjen e Kuvendit të Jashtëzakonshëm të Partisë”, thuhet njoftimin për media të Sekretarit të Përgjithshëm të PD –së, Fidan Mustafa.
“Në këtë takim në mënyrë unanime u bë thirrje që të respektohet vendimi i K. Drejtues për Kuvendin e Jashtëzakonshëm zgjedhor si dhe u mor vendim që ky Kuvend të mbahet me 28 shtator 2016. Të gjitha degët u dakorduan që të angazhohen në mënyrë që ky proces të jetë në plotni konform statutit të partisë dhe vendimeve që Këshilli Drejtues i ka marrë më datë 3 shtator 2016”, thuhet më tej në njoftimin e sotëm.
Kryetari aktual i partisë, Ferid Aganit ka një aktakuzë të ngritur për “Rastin Stenta”, në kohën sa ky ka qenë ministër i Shëndetësisë. /Insajderi.com
